ஈரானால் பாதிக்கப்பட்ட ஹோர்முஸ் நீரிணை பகுதியில் சிக்கித் தவிக்கும் கப்பல்களை பாதுகாப்பாக வெளியேற்ற அமெரிக்கா புதிய முயற்சியை தொடங்கவுள்ளதாக அறிவிக்கப்பட்டுள்ளது.

அமெரிக்க ஜனாதிபதி டொனால்ட் டிரம்ப், திங்கள்கிழமை (மே 4, 2026) இந்த நடவடிக்கை ஆரம்பமாகும் என தெரிவித்தார். இந்த முயற்சி நூற்றுக்கணக்கான கப்பல்கள் மற்றும் சுமார் 20,000 மாலுமிகளை பாதுகாப்பாக வழிநடத்துவதை நோக்கமாகக் கொண்டதாக கூறப்படுகிறது.

ஞாயிற்றுக்கிழமை வெளியிட்ட சமூக ஊடகப் பதிவில், ஈரான் போரால் “நடுநிலை மற்றும் அப்பாவி நாடுகள் பாதிக்கப்பட்டுள்ளன” என்று அவர் குறிப்பிட்டார். மேலும், தடைசெய்யப்பட்ட இந்த நீர்வழிகளில் இருந்து கப்பல்களை பாதுகாப்பாக வெளியேற்ற அமெரிக்கா உதவும் என்றும் தெரிவித்தார்.

மேற்கு ஆசியாவில் “சுதந்திரத் திட்டம்” என்ற பெயரில் இந்த நடவடிக்கை தொடங்கப்படவுள்ளதாகவும், அமெரிக்க பிரதிநிதிகள் ஈரானுடன் பேச்சுவார்த்தை நடத்தி வருவதாகவும் கூறினார். இது அனைவருக்கும் சாதகமான முடிவை உருவாக்கும் என எதிர்பார்க்கப்படுகிறது.

கடந்த பிப்ரவரி 28ஆம் தேதி அமெரிக்காவும் இஸ்ரேலும் போரைத் தொடங்கிய பின்னர், ஹோர்முஸ் நீரிணை பகுதி கடுமையாக பாதிக்கப்பட்டுள்ளது. இதன் விளைவாக உலகளாவிய சந்தைகளும் அதிர்ச்சியடைந்துள்ளன.

போர் தொடங்கியதிலிருந்து எண்ணெய் மற்றும் எரிவாயு கப்பல்கள் உட்பட பல சரக்கு கப்பல்கள் பாரசீக வளைகுடா பகுதியில் சிக்கித் தவிக்கின்றன. கப்பல் பணியாளர்கள் ட்ரோன் மற்றும் ஏவுகணை தாக்குதல்கள் அருகில் நடைபெறுவதையும், உணவு, குடிநீர் போன்ற அத்தியாவசிய பொருட்களின் பற்றாக்குறையையும் சந்தித்து வருவதாக தகவல்கள் தெரிவிக்கின்றன.

இந்த மாலுமிகளில் பலர் இந்தியா மற்றும் தெற்கு, தென்கிழக்கு ஆசிய நாடுகளைச் சேர்ந்தவர்கள் என்றும் குறிப்பிடப்பட்டுள்ளது.

இந்த நடவடிக்கை மனிதாபிமான நோக்கத்துடன் மேற்கொள்ளப்படுவதாக டொனால்ட் டிரம்ப் விளக்கினார். இருப்பினும், இந்த முயற்சியில் ஏதேனும் தலையீடு ஏற்பட்டால் அதற்கு கடுமையான பதில் அளிக்கப்படும் எனவும் அவர் எச்சரிக்கை விடுத்துள்ளார்.

இந்நிலையில், அமெரிக்காவின் சமீபத்திய முன்மொழிவுக்கு பதில் அளிப்பதை ஈரான் மறுபரிசீலனை செய்து வருவதாக தெரிவிக்கப்பட்டுள்ளது. இதேவேளை, மூன்று வாரங்களுக்கு முன் அறிவிக்கப்பட்ட போர் நிறுத்தம் பலவீனமாக இருந்தாலும் தொடர்ந்து நீடித்து வருவதாக கூறப்படுகிறது.