மான்செஸ்டர்: இங்கிலாந்துக்கு எதிரான மூன்றாவது மற்றும் கடைசி ஒருநாள் கிரிக்கெட் போட்டியில், இந்திய மகளிர் அணி 13 ரன்கள் வித்தியாசத்தில் வெற்றி பெற்று, 2-1 என்ற கணக்கில் தொடரைக் கைப்பற்றியது. இந்திய அணியின் கேப்டன் ஹர்மன்ப்ரீத் கவுரின் அபாரமான சதமும், இளம் வேகப்பந்து வீச்சாளர் கிராந்தி கௌட்டின் அற்புதமான பந்துவீச்சும் இந்த வெற்றிக்கு முக்கிய காரணமாக அமைந்தன.

செவ்வாயன்று செஸ்டர்-லீ-ஸ்ட்ரீட்டில் உள்ள ரிவர்சைடு மைதானத்தில் நடைபெற்ற இந்தப் போட்டியில் முதலில் பேட்டிங் செய்த இந்திய அணி, 50 ஓவர்களில் 5 விக்கெட் இழப்புக்கு 318 ரன்கள் குவித்தது. இது இங்கிலாந்துக்கு எதிராக இந்திய மகளிர் அணி எடுத்த இரண்டாவது அதிகபட்ச ஸ்கோர் ஆகும்.

இந்திய அணியின் கேப்டன் ஹர்மன்ப்ரீத் கவுர், தனது ஃபார்முக்கு திரும்பி, அதிரடியாக விளையாடி 84 பந்துகளில் 102 ரன்கள் குவித்தார். இதில் 14 பவுண்டரிகள் அடங்கும். இது ஒருநாள் போட்டிகளில் அவரது ஏழாவது சதமாகும். இந்த சதத்தின் மூலம், மகளிர் ஒருநாள் போட்டிகளில் 4000 ரன்களை கடந்த மூன்றாவது இந்திய வீராங்கனை என்ற பெருமையையும் அவர் பெற்றார்.

ஹர்மன்ப்ரீத் கவுருடன் இணைந்து சிறப்பாக ஆடிய ஜெமிமா ரோட்ரிக்ஸ் 50 ரன்களும், ஸ்மிருதி மந்தனா மற்றும் ஹர்லீன் தியோல் தலா 45 ரன்களும் எடுத்தனர். கடைசி கட்டத்தில் அதிரடியாக விளையாடிய ரிச்சா கோஷ் 18 பந்துகளில் 38 ரன்கள் எடுத்து ஆட்டமிழக்காமல் இருந்தார். இதனால், கடைசி 10 ஓவர்களில் மட்டும் இந்திய அணி 120 ரன்கள் குவித்தது

319 ரன்கள் எடுத்தால் வெற்றி என்ற கடினமான இலக்குடன் களமிறங்கிய இங்கிலாந்து அணியை, இந்திய பந்துவீச்சாளர்கள் ஆரம்பத்திலேயே திணறடித்தனர். குறிப்பாக, இளம் வேகப்பந்து வீச்சாளர் கிராந்தி கௌட், தனது அபார பந்துவீச்சால் இங்கிலாந்து பேட்டிங் வரிசையை சரித்தார். இங்கிலாந்து அணியின் தொடக்க வீராங்கனைகளான டாமி பியூமண்ட் மற்றும் ஆமி ஜோன்ஸ் ஆகியோரை தனது முதல் மூன்று ஓவர்களிலேயே வீழ்த்தி கிராந்தி கௌட் அதிர்ச்சி அளித்தார்.

அதன்பிறகு ஜோடி சேர்ந்த நாட் ஸ்கிவர்-பிரன்ட் மற்றும் எம்மா லாம்ப், மூன்றாவது விக்கெட்டுக்கு 162 ரன்கள் சேர்த்து இங்கிலாந்து அணியை சரிவிலிருந்து மீட்டனர். நாட் ஸ்கிவர்-பிரன்ட் 98 ரன்களில் ஆட்டமிழந்து சதத்தை தவறவிட்டார். இறுதியில், இங்கிலாந்து அணி 49.5 ஓவர்களில் 305 ரன்களுக்கு அனைத்து விக்கெட்டுகளையும் இழந்தது. இந்திய அணி தரப்பில் சிறப்பாக பந்துவீசிய கிராந்தி கௌட் 10 ஓவர்களில் 52 ரன்கள் விட்டுக்கொடுத்து 6 விக்கெட்டுகளை வீழ்த்தினார். இது இங்கிலாந்துக்கு எதிராக ஒரு இந்திய பந்துவீச்சாளரின் சிறந்த பந்துவீச்சு ஆகும்.

இந்த வெற்றியின் மூலம், இந்திய மகளிர் அணி இங்கிலாந்து சுற்றுப்பயணத்தை வெற்றிகரமாக முடித்துள்ளது. முன்னதாக நடைபெற்ற டி20 தொடரையும் இந்திய அணி 3-2 என்ற கணக்கில் கைப்பற்றியது குறிப்பிடத்தக்கது.