இலங்கையில் போதைப்பொருள் அச்சுறுத்தலை முற்றாக ஒழிப்பதற்காக சட்டத் திருத்தங்கள் முதல் புனர்வாழ்வு மற்றும் சமூக விழிப்புணர்வு வரை அனைத்து துறைகளிலும் விரைவான மறுசீரமைப்புகளை மேற்கொள்ளுமாறு அநுர குமார திசாநாயக்க அதிகாரிகளுக்கு அறிவுறுத்தியுள்ளார்.

ஜனாதிபதி அலுவலகத்தில் நேற்று நடைபெற்ற “முழு நாடுமே ஒன்றாக” தேசிய செயற்பாட்டுச் சபைக் கூட்டத்தின் போது இந்த உத்தரவுகள் வழங்கப்பட்டன. கைப்பற்றப்படும் போதைப்பொருட்கள் மீண்டும் சமூகத்திற்குள் செல்லாமல் தடுக்கும் வகையில் அவற்றை சட்டபூர்வமாக விரைவில் அழிக்கவும், குற்றவாளிகளுக்கு தண்டனை வழங்கும் செயல்முறைகளை துரிதப்படுத்தவும் ஜனாதிபதி வலியுறுத்தினார்.

இந்த தேசிய நடவடிக்கை தொடங்கியதிலிருந்து போதைப்பொருள் தொடர்பான சுற்றிவளைப்புகள் 80% அதிகரித்துள்ளதாக அதிகாரிகள் தெரிவித்தனர். 2025 அக்டோபர் 30 முதல் இதுவரை:

5437 கிலோ கஞ்சா

1936 கிலோ ஹெரோயின்

1991 கிலோ “ஐஸ்” போதைப்பொருள்

271 கிலோ கொக்கைன்

15 இலட்சத்திற்கும் அதிகமான போதை மாத்திரைகள்

6 இலட்சத்திற்கும் அதிகமான சட்டவிரோத சிகரெட்டுகள்

கைப்பற்றப்பட்டுள்ளன. இதனுடன் 168,460 சந்தேக நபர்கள் கைது செய்யப்பட்டுள்ளதாக தெரிவிக்கப்பட்டது.

மேலும், 2007ஆம் ஆண்டின் 54ஆம் இலக்க புனர்வாழ்வு திருத்தச் சட்டமூலத்தை விரைவில் அமைச்சரவையில் சமர்ப்பிக்க நடவடிக்கை எடுக்கப்பட்டுள்ளதாகவும் தெரிவிக்கப்பட்டது. போதைப்பொருளுக்கு அடிமையானவர்களை மீண்டும் சமூகத்தில் இணைக்கும் வகையில்:

மனப்பாங்கு அபிவிருத்தி திட்டங்கள்

வேலைவாய்ப்பு பயிற்சிகள்

சுயதொழில் உதவிகள்

போன்ற திட்டங்கள் நடைமுறைப்படுத்தப்பட்டுள்ளன.

போதைப்பொருள் அதிகம் பாதித்த குடும்பங்களை அடையாளம் கண்டு, மத வழிபாட்டுத் தலங்களை மையமாகக் கொண்டு சமூக மாற்றத் திட்டங்களை முன்னெடுக்க வேண்டிய அவசியத்தையும் ஜனாதிபதி சுட்டிக்காட்டினார்.

பாடசாலை மாணவர்களை இலக்காகக் கொண்ட போதைப்பொருள் பரவலைத் தடுக்க கல்வி அமைச்சு மற்றும் மகளிர் பணியகம் இணைந்து மேற்கொள்ளும் நடவடிக்கைகள் குறித்தும் கூட்டத்தில் ஆராயப்பட்டது. மேலும், ஜூன் 26ஆம் தேதி நடைபெறும் சர்வதேச போதைப்பொருள் ஒழிப்பு தினத்தை முன்னிட்டு விழிப்புணர்வு திட்டங்களும் திட்டமிடப்பட்டுள்ளன.

இந்தக் கூட்டத்தில் மதத் தலைவர்கள், அமைச்சு செயலாளர்கள், பாதுகாப்பு அதிகாரிகள் மற்றும் பொலிஸ் துறையின் உயரதிகாரிகள் பலரும் கலந்து கொண்டனர்.